തൃണം

ചിറ്റൂർ ഗവൺമെൻറ് കോളേജിൽ വച്ച് നടന്ന 2017 എ സോൺ കലോത്സവത്തിൽ കവിതാരചനാ മത്സരത്തിൽ രണ്ടാം സ്ഥാനം ലഭിച്ച കവിത. വിഷയം  : 'വെയിൽ വേരിനോട് പറയുന്നത്'

തൃണം

"ദൂരങ്ങളിത്രയും താണ്ടി ഞാൻ വന്നിഹ-

കേവലം നിന്മുഖം കാണ്മതിന്നായ്"

ആകാശമാളിക തള്ളിത്തുറന്നെത്തി

ആശങ്കയോടെയാ രശ്മി ചൊല്ലീ

ദാഹിച്ചലഞ്ഞു കൊണ്ടൂഴിയിൽ മുഖം പൂ-

ണ്ടഹോരാത്രദിനങ്ങളത്രയും തീർക്കുന്ന,

കേവലമന്ത്യജലത്തിനായ് കാക്കുന്ന

വടവൃക്ഷവേരതു കേട്ടു മുഖമനക്കി

"കാണാം എനിക്കു നീ മണ്ണിൽ കിടന്നാർത്തു-

കരയുന്നതൊക്കെയും കേൾപ്പതുണ്ട്

നീ വെള്ളമീമ്പി കുടിക്കയാൽ നിൻവൃക്ഷ-

മൊരുതുള്ളിയൊഴിയാതെ കൊണ്ടൊരീ ഞാനും,

അതുപിന്നെ ക്ഷീണമകറ്റുവാൻ നിന്നരികു-

പറ്റിക്കിടന്നു മനു കൊണ്ടൊരാതണലും

പിന്നയാ നിമിഷങ്ങളൊന്നുമേയോർക്കാതെ

നിൻറെ കൂട്ടരെക്കഷണിച്ചു തീർത്ത സൗധങ്ങളും

പുകതുപ്പുമാവിയന്ത്രങ്ങളും മലിനജലം-

പുഴയിലൊഴുക്കുമാ-കാളകൂടശാലയും

എൻ സഖി മഴവന്നു നൽകുമാ കുളിരും കുഴിമൂടി-

യൊഴുക്കിക്കളയുവാൻ  കാട്ടിയ തൃഷ്ണയും

പൊടിയുന്നുകണ്ണുനീരെന്നിലും ഇളം തണു-

പ്പടിക്കാനാവാത്ത നിന്നുടൽ കാണവേ

മഴകാത്തു കാത്തു നീ കാലം കഴിക്കിലും

മഴയങ്ങുമാറിപ്പിണങ്ങിയിരിക്കിലും

ഉറവതേടിത്തേടി ദൂരെ നീ പോകിലും

അറിയാത്തവഴികളിൽ ശങ്കിച്ചു നിൽക്കിലും,

വീണ്ടും വരാമെന്നുപോയൊരാ മഴയങ്ങ്

മരുകളിൽ പെയ്യുന്നു സങ്കടമൊക്കെയും

എൻറെ കാഠിന്യമേറെയാൽ നീപെടും പാടു-

കളൊക്കെയും കാണാം എനിക്കിങ്ങു

കഠിനതയേറ്റി നിൻ മരണമടുപ്പിച്ച

മൂഢമർത്യനെയങ്ങു പഴുപ്പിക്കണം

മണ്ണിനാഴങ്ങളിൽ നീ തേടിയലയുക

ഒളിച്ചാണ്ടു പോയൊരാ വെള്ളത്തിനായ്

നിൻപ്രണയമൂഴിയുമായല്ല, ചുംബിക്കു-

മാർദ്രയാം വെള്ളത്തെ തന്നെയാവാം

മമ ദേഹംതുളച്ചു നിന്നെ സഹായിക്കും

മണ്ണു നിന്നുടെ ചങ്ങാതി തന്നെയാവാം

ഒന്നിച്ചുനിൽക്കുക ദേഷ്യം വെടിഞ്ഞുകൊ-

ണ്ടീവർഷമാകാശവർഷത്തിനായ്

നിന്നുടെ ദാഹമകന്നിടും, നിന്നുടൽ

ശോഭയേറിത്തിളങ്ങിടും, കാണാം.."

മേഘം മറച്ചുടൻ വെയിലൊളിച്ചൂ

മറുപടിയേകുവാനാകാതെ വേരു നിന്നൂ

"ആരുമേയറിയില്ലയെന്നെ, എന്റെ ശക്തിയെ

ഞാനില്ലയെങ്കിലീ പാട്ടില്ലെഴുത്തില്ല,

ആരുമേ കവിതപാടുവാനേയില്ല,

ഇതുവരയുമീത്തൂലികത്തുമ്പുപോലും തൃണം.."

--------------------------------------------------------------------------

NB : മത്സരത്തിൻറെ അവസാന നിമിഷങ്ങളിൽ കാട്ടിയ വെപ്രാളം അവസാന വരികളിൽ വരുത്തിവെച്ച അപൂർണത (എന്നെനിക്കു തന്നെ തോന്നുന്ന) അതേപടി നിലനിർത്തിയിരിക്കുന്നു..